நண்பர் ஊடகவியலாளர் கே.பொன்னுத்துரை (பொன்னுத்துரை கிட்ணர்) இலங்கைத் தமிழ் முற்போக்கு இலக்கியத்தின் முன்னோடிகளில் ஒருவரான கே.கணேஷின் நூற்றாண்டினையொட்டி வெளியான 'முற்போக்கு இலக்கிய ஆளுமை கே.கணேஷ் மொழிபெயர்ப்புகள்' என்னும் நூலை அனுப்பியிருந்தார்.
மிகசிறப்பாக நூல் வெளிவந்துள்ளது. 'கே.கணேஷ் நூற்றாண்டு விழாக்குழு' நூலை வெளியிட்டுள்ளது. குமரன் அச்சகம் சிறப்பாக நூலை அச்சு வடிவில் வெளிக்கொணர்ந்துள்ளது. இந்நூலைச் சிறப்பாகத் தொகுத்துள்ள ஊடகவியலாளர் கே.பொன்னுத்துரை அவர்கள் பாராட்டுக்குரியவர். மிகவும் முக்கியமான பணியினை அவர் செய்துள்ளார். ஆவணச்சிறப்பு மிக்க இத்தொகுப்பை வெளியிட்ட 'கே.கணேஷ் நூற்றாண்டு விழாக்குழு'வின் பணி போற்றத்தக்கது.
 |
| - தொகுப்பாளர் கே. பொன்னுத்துரை - |
நூலின் ஆரம்பத்தில் பி.பி.தேவராஜின் எழுத்தாளர் கே.கணேஷ் பற்றிய அறிமுகக்கட்டுரை, பேராசிரியர் சபா ஜெயராசாவின் கட்டுரை, ஞானம் சஞ்சிகையில் வெளியான அதன் ஆசிரியர் தி.ஞானசேகரன் கே.கணேஷுடன் நடத்திய நேர்காணல் ஆகியவை இடம் பெற்றுள்ளன. இவை கே.கணேஷின் பன்முக ஆளுமையினை வெளிப்படுத்தும் கட்டுரைகள். இலங்கை எழுத்தாளர் சங்கம், முற்போக்குத் தமிழ் எழுத்தாளர் சங்கம் (இலங்கை, இந்தியா) ஆகியவற்றில் அவரது பங்களிப்பு, அவரது குடும்பப்பின்னணி, தமிழக சஞ்சிகைகளில் (மணிக்கொடி போன்ற) வெளியான அவரது படைப்புகள், அவரைப் பாதித்தக் கலை, இலக்கிய ஆளுமைகள், இலங்கையில் தமிழில் வெளியான முதலாவது முற்போக்கு சஞ்சிகையில் அவருடன் இணைந்து பங்களித்த கே.ராமநாதன், அ.ந.கந்தசாமி ஆகியோரின் பங்களிப்பு, அவர் மொழிபெயர்த்த உலக முற்போக்கு எழுத்துலகச் சிற்பிகளின் படைப்புகளின் பகுதிகள் இவற்றுடன் அவர் மொழிபெயர்த்த முல்க்ராஜ் ஆனந்தின் 'தீண்டாதான்' (Untouchable) முழுமையாகத் தொகுப்பில் உள்ளடக்கப்பட்டுள்ளன. பன்முகப்புலமை மிக்க எழுத்தாளர் கே.ஏ.அப்பாஸின் சிறுகதைகள் இவர் மொழிபெயர்ப்பில் 'குங்குமப்பூ' என்னும் பெயரில் வெளியாகியுள்ளது. அத்தொகுப்புக் கதைகளும் முழுமையாக இத்தொகுப்பில் உள்ளடக்கப்பட்டுள்ளன.
சீன எழுத்தாளர் லூசுன், வியட்நாமின் தந்தை ஹோ சி மின் உட்படப் பல உலக முற்போக்கு எழுத்தாளர்களின் எழுத்துகளையும் (புனைவுகள் & கவிதைகள்) நூலிலுள்ளன.
கே.கணேஷின் மொழிபெயர்ப்புகளுடன் சிறுகதைகள், கவிதைகள், கட்டுரைகள் எனப் பன்முகப் பங்களிப்பு செய்தவர். மாதிரிக்கு அவரது இரு சிறுகதைகளும் நூலின் இறுதியில் இணைக்கப்பட்டுள்ளன. அத்துடன் அவரது மொழிபெயர்ப்பில் வெளியான நூல்களின் அட்டைப்படங்களையும் நூல் கொண்டுள்ளது.
அத்துடன் கே.கணேஷ் எழுதிய நூல்களின் பெயர்ப்பட்டியல், பெற்ற விருதுகள் பற்றிய விபரங்கள், அவரது பணி, இலக்கிய அமைப்புகளில் அவரது அங்கத்துவம், பங்குபற்றிய இலக்கிய மாநாடுகள் போன்ற விபரங்களையும் நூல் தருகிறது.
இலங்கையில் தமிழில் வெளியான முதலாவது மார்க்சியச் சிந்தனை மிக்க சஞ்சிகையான பாரதி சஞ்சிகைகள் அனைத்தும் சேகரிக்கப்பட்டு முழுமையாக அத்தொகுப்பு தனியாக வருவதும் அவசியம். எழுத்தாளர் தெளிவத்தை ஜோசப் தனது நூலொன்றில் வெளியான பாரதி சஞ்சிகை பற்றிய விபரங்களை, படைப்புகள் உட்பட, ஆவணப்படுத்தியுள்ளார். அவரது குடும்பத்தினரிடம், இலங்கைச் சுவடிகள் திணைக்களத்திடம் பாரதி இதழ்கள் இருக்கக்கூடும். இது போல் கே.கணேஷின் படைப்புகள் அனைத்தும் சேகரிக்கப்பட்டு தொகுப்பாக வெளிவருவதும் முக்கியமானது.
சிறப்பான தொகுப்பு. வாழ்த்துகள்.
No comments:
Post a Comment