க.பாலேந்திராவின் இயக்கத்தில் 'ஒரு பாலை வீடு'

அவைக்காற்றுக் கழகத்தின் தயாரிப்பில் , நாடகவியலாளர் பாலேந்திராவின் இயக்கத்தில் வெளியான நாடகம் 'ஒரு பாலை வீடு'. இந்நாடகம் Federico García Lorca
 என்னும் ஸ்பானிய நாடகாசிரியரின் 'தி ஹவுஸ் ஆஃப் பேர்னார்டா அல்பா' (The House of Bernarda Alba ) என்னும் நாடகமே தமிழில் 'ஒரு பாலை வீடு' என்னும் பெயரில் மேடையேற்றப்பட்டது. மேடையேற்றியவர்கள் சுண்டுக்குளி பழைய மாணவியர் சங்கம் என்பதும் குறிப்பிடத்தக்கது.

Federico García Lorca ஒரு பாலினச் சேர்க்கையாளர். ஸ்பானிய உள்நாட்டு யுத்தத்தில் இடதுசாரிஅமைப்பான குடியரசுக் கட்சியினை ஆதரித்த இவரை வலது சாரிகளும், பாசிசவாதிகளுமான தேசியப் படையினர் படுகொலை செய்தனர் என்பது துயரகரமானது. இவரது உடல் கூடக் கிடைக்கவில்லை.

யாழ்ப்பாணத்தில் மேடையேற்றப்பட்டபோது , அதனைப்பற்றிய சிறப்பானதொரு விமர்சனத்தை , சிரித்திரன் சஞ்சிகையின் வைகாசி 1979 இதழில் எழுதியிருக்கின்றார் ஆ.க.பராக்கிரமசிங்கம்.  நாடக இயக்கத்தை, அரங்கு அமைப்பை, நடிகர்களின் திறமையை  என அவற்றை விதந்து தனது விமர்சனத்தில் எழுதியிருக்கும் கட்டுரையாளர்,  தனது விமர்சனத்தின் இறுதியில் ஈழத்து நாடகத்துறையையிட்டு நம்பிக்கை ஏற்பட்டுள்ளது எனவும், அதற்காக பாலேதிராவையும், அவைக்காற்றுக் கழகத்தையும் பாராட்டியிருக்கின்றார்.

இந்நாடகம் பெர்ணார்டா அல்பா என்னும் பெண்மணியையும், அவரது திருமணமாகாத  ஐந்து பெண்கள் பற்றியும் வைத்துப்பின்னப்பட்ட நாடகம் 'ஒரு பாலை வீடு' என்பதையும், நாடகத்தின் தமிழாக்கத்தைச் செய்த நிர்மலா நித்தியானந்தனே , நாடகத்தின் பிரதான வேடமான பெர்னார்டோ அல்பா வேடத்தில் நடித்திருப்பதையும், அவரது கடைசிப் பெண்ணாக நிர்மலா நித்தியானந்தனின் கடைசித்தங்கையான சுமதி ராஜசிங்கம் நடித்திருப்பதையும் மேற்படி விமர்சனத்திலிருந்து அறிய முடிகின்றது. 

Federico García Lorca

இந்நாடகத்தை நான் இதுவரை பார்க்கவில்லை. ஆனால் 'கண்ணாடி வார்ப்புகள்' மூலம் நிர்மலா ராஜசிங்கத்தின் நடிப்பை அறிந்திருக்கின்றேன். அது போல் இந்நாடகத்திலும் அவர் சிறப்பாக நடித்திருப்பார் என்பதை ஊகிக்க முடிகின்றது. விமர்சகரும் நிர்மலா நித்தியானந்தனின் நடிப்பைப்பற்றிக் குறிப்பிடுகையில் 'மிடுக்கான, அமைதி மிக்க, பரபரபற்ற நடிப்பு' என்று குறிப்பிட்டிருக்கின்றார்.  நாடகத்தைப் பார்க்க வேண்டுமென்ற ஆர்வத்தையும் மேற்படி விமர்சனம்  தூண்டுகின்றது.

விமர்சனம் வெளியான சிரித்திரன் பக்கத்தை இங்கு காண்கின்றீர்கள். மேற்படி  சிரித்திரன் வைகாசி 1979 இதழை வாசிக்க  - https://noolaham.net/project/967/96686/96686.pdf